Comics novelist Pablo Gomez, pumanaw na

December 28, 2010 | Tuesday | 7:30 am

DZRH NEWS

Sumakabilang buhay na ang beteranong comics novelist na si Pablo Gomez sa edad 81 makaraang atakihin ito sa puso.

Ang sikat na comics novelist ay binawian ng buhay sa Sta. Teresita Hospital sa Quezon City kamakalawa ng gabi.

Hindi magiging kumpleto ang kasaysayan ng komiks at pelikula kung wala ang pangalan ni Pablo Gomez, ang lumikha ng Juanita Banana at Petrang Kabayo.

Nakaburol ngayon ang mga labi ni Gomez sa St. Peter mortuary chapel sa Quezon City at itinakda na sa December 30 ang cremation nito.

Ayon sa kanyang kapatid na si Santos Gomez, masyadong dinamdam ng manunulat ang pagpanaw ng kanyang kapatid na si Leonaro noong bisperas ng pasko.

Taong 1950s nang sumikat si Gomez sa industriya ng komiks at sa loob ng anim na dekada, nilikha ni gomez ang maraming hindi malilimutang obrang kinalugdan ng mga adik sa komiks at manonood kabilang ang Gilda, Kurdapya, Torkwatta, Susanang Daldal, Guy and Pip, Magdusa Ka, Rosa Mistika, Machete at iba pa.