Maria Venus Raj gustong makuha ang korona sa Miss Universe 2010
July 30, 2010 | Friday | 10:30 am
Desidido si Binibining Pilipinas-Universe Maria Venus Raj na magningning sa nalalapit na pageant ng Miss Universe 2010 na gaganapin sa Las Vegas, USA sa August 24.
Ilan sa mga pinaghahandaan ni Raj ay ang kaniyang catwalk, posture, self-confidence sa entablado, at maging ang ilang techniques sa harap ng camera.
Kasama sa training ng Filipino-Indian beauty na tubong Camarines Sur ang iba pang Binibining Pilipinas beauties na sina Binibining Pilipinas-World Czarina Gatbonton, 1st runner-up Diane Necio at ang 2nd runner-up na si Nicolette Henson na pawang nagpahayag naman ng suporta sa pambato ng bansa.
Binigyan din ng payo ni People’s Champ Manny Pacquiao si Raj bago pa man ito lumipad papuntang Las Vegas sa darating na Linggo.
Ayon naman kay Raj, gusto din niyang manalo sa nasabing lugar tulad ng ginagawa ni Pacman sa tuwing may boxing fight ang pambansang kamao.
Gaganapin ang prestihiyosong beauty pageant sa Mandalay Bay Resort & Casino kung saan ginanap ang ilang laban ni Pacquiao.
Habang sinusulat ang artikulong ito, nangunguna pa rin si Maria Venus Raj para sa Miss Universe 2010 poll na may rating na 3.44. Kasunod ni Raj si Marelisa Gibson ng Venezuela, Natalia Navarro ng Colombia, Jimena Navarrete ng Mexico, at Debora Lyra ng Brazil.
Kasalukuyang hawak pa rin ni Stefania Fernandez ng Venezuela ang Miss Universe title matapos manalo last year sa Bahamas.
Source: Miss Universe Official Website (www.missuniverse.org)
