Wowowee papalitan ng isang game at variety show

July 28, 2010 | Wednesday | 11:25 am

Tuluyan na ngang mamamaalam sa ere ang tinaguriang “programa ng bawat Pilipino” na Wowowee dahil papalitan na ito ng isang game/variety show na pangungunahan ng “Queen of all Media” na si Kris Aquino.

Ayon sa ABS-CBN, magsisimula nang umere ang Pilipinas, Win Na Win! sa darating na Sabado, July 31, bilang kapalit ng noontime show na Wowowee ni Willie Revillame.

Kasama ni Kris Aquino sa show si Robin Padilla, Valerie Concepcion, Mariel Rodriguez, at ang comedienne na si Pokwang.

Kinumpirma naman ng ABS-CBN na alam na rin ni Willie Revillame ang nasabing pagbabago.

Sa isang interview naman ng TV Patrol World kay Pokwang hinggil sa paglulunsad ng Pilipinas, Win Na Win!, sinabi ng comedienne/actress na siya mismo ay nagulat at talagang nagpapasalamat, sabay kuha ng tissue paper dahil sa mangiyak-ngiyak na pahayag ng host.

Ilan sa mga mamamahala ng Pilipinas, Win Na Win! ay sina Direk Johnny Manahan, Creative Director Bobot Mortiz, Business Unit Head Jay Montelibano, Executive Producers Phoebe Anievas at Rancy Recato. (Updated)