‘KKK’ sinisisi ni Mikey Arroyo sa pagbaba ng ratings ni PNoy
June 21, 2011 | Tuesday | 4:51 pm
DZRH NEWS
Umani ng iba’t-ibang reaksyon sa Kamara ang muling pagbagsak ng satisfaction ratings ni Pangulong Noynoy Aquino.
Agad bumanat si Ang Galing Pinoy party list Rep. Juan Miguel ‘Mikey’ Arroyo na ang dahilan ng pagbaba ng ratings ni Pangulong Aquino ay ang kanyang ‘KKK’ o kaibigan, kaklase at kabarilan.
Ayon pa kay Arroyo, anak ni dating Pang. Gloria Macapagal Arroyo, dapat ay maisip ni Pangulong Aquino na wala na siya sa panahon ng kampanya kaya kailangan niyang kumilos upang tugunan ang mga problema ng bansa sa halip na palagiang sisihin ang nagdaang administrasyon.
Binalewala naman ng mga kakampi sa Kamara ang pagbagsak ng satisfaction ratings ng pangulo.
Katuwiran ni Iloilo Rep. Neil Tupaz Jr., maliit na bagay lamang ang limang porsiyentong ibinaba ng ratings ni Pang. Aquino kumpara sa napakaraming problema na kinakaharap ng bansa.
Sa panig ni Bagong Henerasyon party list Rep. Bernadette Herrera-Dy, tataas pa rin ang ratings ng pangulo pagkatapos ng kanyang state of the nation address (SONA) dahil maririnig ng taumbayan ang mga nagawa ng kanyang administrasyon.
