Bagong witness sa Maguindanao massacre, idiniin si Ampatuan
March 10, 2010 | Wednesday | 10:06 am
DZRH NEWS (MARCH 10, 2010)
Isang bagong testigo sa Maguindanao Massacre ang nagpasyang lumantad upang idiin si Datu Unsay Mayor Andal Ampatuan Jr. sa karumal-dumal na krimen.
Tahasang sinabi ng witness na itinago sa pangalang “Jesse” na si Andal Jr. ang nanguna sa halos 200 armadong kalalakihan na walang awang pumaslang sa 57 katao, kabilang ang 30 mamamahayag.
Ayon sa testigo, armado ang alkalde ng “baby” M203 assault rifle nang pamunuan ang massacre sa bayan ng Ampatuan noong Nov. 23, 2009.
Inamin ni Jesse na isa siya sa pitung itinalagang hitmen sa nabanggit na pagkakataon.
Ipinahayag ng testigo na bukod sa kaniya at kay Andal Jr., ang iba pang nagkaroon ng direktang pananagutan sa massacre ay sina Kanor Ampatuan, Ban Ampatuan at Mama Ampatuan, gayundin sina PO1 Ando Masukat at isang alyas Kudja.
