Bilang ng balota, kulang dahil sa kabagalan ng pag-iimprenta
March 11, 2010 | Thursday | 10:19 am
DZRH NEWS (MARCH 11, 2010)
Nanganganib na malagay sa alanganin o maantala ang produksyon ng mga balota na gagamitin sa nalalapit na halalan sa Mayo.
Ito ang pangamba ni Esmeralda Amora-Ladra, pinuno ng Comelec Printing Committee matapos mapuna ang kabagalan sa pag-imprenta ng mga tinutukoy na dokumento.
Ayon sa opisyal, hindi gumagana nang maayos ang apat na makina ng National Printing Office, kung kaya’t mahihirapan na mai-produce sa tamang oras ang halos 50 milyong balota.
Dahil dito, hiniling ni Ladra sa Comelec Project Management office na bumalangkas ng contingency measures, kabilang ang pag-imprenta ng mga balota para sa manual elections, sakaling malagay sa peligro ang produksyon ng mga dokumento sa automated polls.
Napag-alaman na aabot pa lamang sa 7.9 milyung balota ang na-imprenta hanggang noong March 1, na ang 5.3-milyun ay tinanggap bilang “good ballots” samantalang ang ibang balota ay hindi pa nakukumpirma.
