Bilang ng mahihirap, tumaas sa termino ni GMA
March 8, 2010 | Monday | 11:24 am
DZRH NEWS (MARCH 8, 2010)
Inamin ng isang economic adviser ni Pangulong Arroyo ang kabiguan ng administrasyon na mapahupa ang talamak na kahirapan sa bansa.
Tahasang sinabi ni Albay Gov. Joey Salceda na bagama’t marami sa mga mayayaman ay lalo pang yumaman, lumawak naman ang hanay ng mga mahihirap simula nang umupo ang pangulo noong 2001.
Sa katunayan, tinukoy ni Salceda ang pag-aaral ng National Statistical Coordination Board tungkol sa dami ng mga naghihirap na Pilipino.
Ayon sa data, mula sa 25.4-milyon noong 2001, lumaki ng hanggang sa 27.6-milyon ang bilang ng mga mahihirap na Pinoy noong 2006.
Bukod rito, dumoble din ang antas nang kagutuman, mula 11.4% noong 2000 ay naging 20.3% noong nakalipas na taon.
Ipinahayag ni Salceda na kung pagbabatayan ang average economic growth ng bansa sa nakalipas na apat na dekada, malamang na abutin pa ng 37 taon bago magkaroon ng improvement ang kabuhayan ng mga mahihirap na Pilipino.
