EO sa pagbuo ng Truth Commission pirmado na ni PNoy
July 31, 2010 | Saturday | 7:22 am
DZRH NEWS
Maaari nang simulan ng Truth Commission ang pagta-trabaho para imbestigahan ang mga anomalyang kinasasangkutan ni dating Pangulong Gloria Macapagal Arroyo at kanyang mga opisyales.
Ito ay makaraang lagdaan ni Pangulong Noynoy Aquino ang Executive Order No. 1 para sa pagbuo ng “Philippine Truth Commission of 2010″ alinsunod sa kanyang pangako na gagawin sa unang 100 araw ng kanyang panunungkulan.
Pormal ding itinalaga ni PNoy si dating SC Chief Justice Hilario Davide Jr. bilang chairman ng Truth Commission.
Una sa trabaho ng komisyon ay tukuyin at imbestigahan ang mga alegasyon ng katiwalian na kinasasangkutan ng Arroyo administration at mga opisyales nito.
Apat pang miyembro ng komisyon ang itatalaga, kabilang dito si retired SC Justice Romeo Calleja.
May kapangyarihan ang Truth Commission na magpalabas ng subpoena ngunit wala itong contempt powers at hanggang recommendatory lamang ito at dadaan pa rin sa Office of the Ombudsman.
Binigyan ng Palasyo ang komisyon hanggang December 31, 2012 para tapusin ang kanilang trabaho.
