Police official, nakaligtas sa ambush
March 11, 2010 | Thursday | 10:19 am
DZRH NEWS (MARCH 11, 2010)
Nasa stable na kondisyon na ang kontrobersiyal na police official na inambush ng mga armadong riding-in-tandem sa mataong lugar sa Quezon City kahapon ng hapon.
Ang biktimang nakaligtas kay kamatayan ay si Supt. Napoleon Cauyan, nakatalaga sa Police Holding Administration Office sa Camp Crame.
Si Cauyan ay lulan ng kanyang Nissan Navarra pick-up kasama ang isang babae nang paulanan ng bala ng mga suspect na nakasakay sa motorsiklo sa Brgy. Pinahan, Quezon City, ganap na ala-1:30 ng hapon.
Sa kabila ng kanyang mga tama, nagawa pa ni Cauyan na paandarin ang kanyang sasakyan na bumangga sa isang poste at gumapang palabas upang iligtas ang kanyang sarili.
Inaalam pa ng pulisya kung may kaugnayan ang pananambang kay Cauyan sa pagpatay kay jueteng whistleblower Boy Mayor sa Pasay City noong Pebrero 28.
Sinasabing malapit na kaibigan ni Cauyan si Mayor at sa katunayan ay natagpuan ang ID ng PNP Official sa sasakyang gamit ng jueteng whistleblower noong ito ay ambushin.
