AFP Chief: Sa Diyos lang ako magpapagamit
March 11, 2010 | Thursday | 10:20 am
DZRH NEWS (MARCH 11, 2010)
Sa “Diyos lang ako magpapagamit.”
Ito ang bahagi ng talumpati ni Lt. Gen. Delfin Bangit sa isinagawang Change of Command Ceremonies sa Camp Aguinaldo kahapon sa harap ng mga batikos at pagkuwestiyon sa pagtatalaga sa kanya bilang bagong Chief of Staff ng Armed Forces of the Philippines kapalit ng nagretirong si Gen. Victor Ibrado.
Sinabi ni Bangit na bilang chief of staff, hindi niya sisirain ang AFP at kanya itong dadalhin sa tamang landas, partikular ngayong panahon ng eleksiyon.
Sa kanyang mga kritiko, sinabi ng heneral na patutunayan niya na hindi siya ganoong klase ng commander na dadalhin sa kapahamakan ang kanyang mga sundalo. Hindi anya siya papayag na gamitin ang AFP para sa partisan politics at sa Diyos lamang siya magpapagamit.
Kasabay nito, umapela si bangit sa mga pulitiko at kanyang mga kritiko na huwag idamay sa pulitika ang kasundaluhan.
Ipinagtanggol din ng opisyal si Pangulong Arroyo, ang kanyang commander in chief, sa pagsasabing kailanman ay hindi siya tumanggap o nakarinig dito ng anumang ilegal na kautusan.
