Malacañang: Power crisis sa Mindanao, gagawan ng paraan
March 10, 2010 | Wednesday | 10:02 am
DZRH NEWS (MARCH 10, 2010)
Uumpisahan na ng Malacañang ang pagbalangkas ng mga plano na magpapahupa, kundi man agad na lulutas sa umiiral na energy crisis sa Mindanao.
Ayon sa bagong talagang Executive Secretary Leandro Mendoza, limang options ang iminungkahi ni Energy Secretary Angelo Reyes na ipi-presinta sa ilang piling miyembro ng gabinete.
Sinabi ni Mendoza na sa loob ng susunod na dalawa hanggang tatlong araw ay magkakaroon ng desisyon tungkol sa paraan na ipatutupad upang maresolba ang krisis ng enerhiya sa Mindanao.
Ipinahayag ng opisyal na kabilang sa option ang paghiling ng tulong sa pribadong sektor, batay sa mungkahi ng Mindanao Business Council at Mindanao Electrict Power Alliance.
Samantala, umabot na sa 750 megawatts mula sa dating 400 megawatts ang power deficiency o ang kakulangan ng suplay ng kuryente sa naturang rehiyon.
