Mas nakaka-alarma ang dengue kaysa H1N1 – DOH
July 13, 2010 | Tuesday | 8:32 am
DZRH NEWS
Pinayuhan ng Department of Health (DOH) ang publiko na mag-ingat sa mga usong sakit ngayong panahon ng tag-ulan, tulad ng trangkaso o H1N1 at dengue.
Ang paalala ay ginawa ni DOH Secretary Enrique Ona makaraang maitala ang anim na kaso ng H1N1 sa Ilocos Sur.
Kinumpirma ni Ona na anim na elementary students sa Candon City, Ilocos Sur ang positibo sa nasabing virus ngunit ang mga ito ay magaling na.
Gayunpaman, sinabi ng kalihim na walang dapat ikabahala ang publiko sa H1N1 na ngayon ay itinuturing na lamang na isang ordinaryong trangkaso.
Mas nakababahala umano ang mga naitalang kaso ng dengue na umaabot na ngayon sa mahigit 25,000, mas mataas ng 40 porsiento sa katulad na panahon noong nakaraang taon.
