Pilipinas nanguna sa Earth Hour
March 29, 2010 | Monday | 9:48 am
DZRH NEWS (MARCH 29, 2010)
Nanguna ang Pilipinas sa iba pang bansa na lumahok sa matagumpay na pagdaraos ng tinatawag na “Earth Hour” noong Sabado ng gabi.
Batay sa pagtaya, mahigit sa 1,000 siyudad at munisipalidad sa Pilipinas ang nakibahagi sa nabanggit na aktibidad.
Ayon sa organizers ng Earth Hour, ang nabanggit na bilang ay itinuturing na pinaka-malaki sa kahit na anong bansa na sumuporta sa naturang programa.
Kabilang sa mga nanguna sa “pag-switch-off” ng kuryente mula alas-8:30 ng gabi hanggang alas-9:30 ang Manila Cathedral, Fort Bonifacio at Global City, gayundin sa monumento ni Gat. Jose Rizal.
Bukod sa mga nabanggit na lugar, isang oras din na nabalot ng kadiliman ang Quezon Memorial Circle at Manila City Hall samantalang nagkaroon ng count-down at switch-off event sa Mall of Asia dito sa Pasay City.
Noong 2009 ang Pilipinas ang nanguna sa 88 bansa na lumahok sa kahalintulad na Earth Hour activity.
