PNP, siniguro ang kahandaan ng pulisya sa Mayo
March 11, 2010 | Thursday | 10:20 am
DZRH NEWS (MARCH 11, 2010)
Siniguro ni PNP Chief Director General Jesus Verzosa ang kahandaan ng pulisya na labanan ang anumang pagtatangka na isabotahe o pigilin ang nalalapit na halalan sa Mayo.
Binigyang-diin ni Verzosa na mananatiling tapat sa konstitusyon ang PNP, lalo na sa pagkakataon na may magbabalak sumuway sa kagustuhan ng taong-bayan.
Ipinahayag ng PNP Chief na wala siyang susundin na anumang kautusan na magdudulot ng malaking panganib sa demokrasya ng bansa.
Idinagdag ni Verzosa na kahit ang bagong talagang si AFP Chief Gen. Delfin Bangit ay kaniyang kokontrahin kapag tinangka nitong i-upo si GMA bilang hold-over president kahit tapos na ang kaniyang termino sa June 30.
