Roach: Pacman, mag-ingat sa “lethal weapon” ni Clottey
March 11, 2010 | Thursday | 10:10 am
DZRH NEWS (MARCH 11, 2010)
Pinag-iingat ni Coach Freddie Roach si Manny Pacquiao sa upper cut at headbutt ni Joshua Clottey sa kanilang nalalapit na pagtutuos sa March 13 sa Dallas , Texas.
Sinabi ni Roach na batay sa mga nakalipas na laban ni Clottey, maituturing na “lethal weapon” nito ang kaniyang upper cut.
Ayon sa premyadong coach, may mga pagkakataon din na maruming maglaro ang pambato ng bansang Ghana, partikular sa paggamit ng headbutt sa tuwing siya ay mako-korner nang kalaban.
Dahil dito, ipinahayag ni Roach na maaring dumistansiya lamang at hindi makipagsabayan si Pacman upang makaiwas sa taktika ni Clottey.
Samantala, lakas loob na sinabi naman ni Kwaku Gyami, isa sa mga miyembro ng Team Clottey na dederetso sa ospital ang pambansang kamao pagkatapos ng kanilang laban sa Sabado o araw ng Linggo dito sa Maynila.
