Senado Mangingialam Sa Isyu ng Pagkawasak ng Coral Reefs
May 26, 2011 | Thursday | 3:54 pm
DZRH NEWS
Manghihimasok na ang Senado sa pagkawasak ng halos pitong libong hektarya ng coral reefs sa Moro Gulf at Sulu Sea.
Ito’y matapos magharap ng Resolution No. 491 si Senadora Loren Legarda na humihiling sa Senate Committee on Environment and Natural Resources na imbestigahan ang pagkasira ng seabed sa nasabing lugar na doble ang lawak sa sukat ng Maynila.
Ayon kay Sen. Legarda, Chairperson ng Senate Committee on Climate Change, mahigit 21-libong piraso ng black coral at may 161 endangered turtles ang kinuha at naibenta ng mga mangingisda na umaabot na sa mahigit P35million.
Sinabi ni Legarda na dapat managot ang mga taong lumabag sa Fisheries Code of 1998 dahil sa pagpinsala sa mga lamang dagat.
Iginiit ng senadora na amyendahan ang Fisheries Code dahil masyadong mababa ang ipinataw na parusa sa mga illegal na negosyante at poacher sa marine biodiversity.
Pinagpapaliwanag din ng senadora ang mga opisyal ng Philippine Navy, Philippine Coast Guard, Philippine National Police, Department Of Agriculture at maging ang local government units sa paligid ng Moro Gulf at Sulu Sea hinggil sa nasabing illegal na pagkuha ng black coral at iba pang marine life.
