Jericho Rosales tumanggap ng kaniyang 2nd music award

June 24, 2010 | Thursday | 2:00 pm

Web photo

Blessed na blessed talaga ang hunk actor, na ngayon ay masasabi nang achiever na rin sa larangan ng musika, matapos maiuwi ni Jericho Rosales ang award bilang “Most Promising Male Singer” sa prestihiyosong Guillermo Mendoza Memorial Scholarship Foundation Inc. Box Office King and Queen Awards Night sa RCBC Plaza, Makati City kamakalawa ng gabi.

Tuwang-tuwa si Echo nang matanggap niya ang kaniyang second award sa pagkanta lalo pa’t nagmula ito sa isang kilalang award-giving body.

Maituturing na malayo na talaga ang narating ng gwaping ng gwaping na talent ng ABS-CBN dahil bukod sa bagong milestone niya sa musika, hindi rin naman lingid sa kaalaman ng lahat ang naiambag niya pagdating sa movie industry at mga top-rating na soap operas.

Isa sa mainstay ng ASAP XV si Echo. Isang malaking tulong para sa actor/singer ang nasabing programa para mas lalo pa niyang mapagbuti ang kinahihiligang pagkanta.

Kasama rin si Echo sa latest movie ni Gabby and KC Concepcion na “I’ll Be There” kung saan ang role ng hunk actor ay isang single father. Though limited ang scenes ni Echo at KC sa film, super nakakakilig naman daw ang mga ka-eksenahan ng dalawa.