YesFM, Best FM Station sa 8th Gawad Tanglaw

March 4, 2010 | Thursday | 4:35 pm

Inuwi ng 101.1 YesFM ang dalawang natatanging pagkilala sa larangan ng radyo mula sa 8th Gawad Tanglaw na ginanap sa Jose Rizal University kagabi.

Nakuha ng YesFM ang BEST FM STATION at BEST RADIO STATION awards mula sa award-giving body na binubuo ng mga kritiko mula sa akademiya.

Tinanggap ng mga DJs mula sa YesFM ang mga parangal kasama si YesFM Station Supervisor Karen Golfo.

Napuno ang JRU quadrangle ng mga sikat na personalidad mula sa larangan ng pelikula, TV, radyo, at teatro.

Nagpadagdag pa sa ingay ng gabi ang mga estudyante ng naturang paaralan, na nagsilbing host ng ika-walong taon ng Gawad Tanglaw.

Ang Gawad Tanglaw o Gawad Tagapuring mga Akademisyan ng Aninong Gumagalaw ay binubuo ng mga film critics, scholars, at history and humanities professors na nagbibigay parangal sa film, TV, theater at radio arts.

Dalawang magkasunod na taon nang naging Best FM Station ang YesFM dahil sa nakaraang taon, ang istasyon din ang nakakuha ng parangal mula sa naturang award-giving body.

Ilang artista, tumanggap din ng parangal

Ilan sa mga showbiz personalities na dumalo sa Gawad Tanglaw ay sina Ms. Isabel Lopez na nagwagi bilang Best Supporting Actress para sa Kinatay at Tulak; Coco Martin na nakakuha ng Presidential Jury Award for Excellence in Acting; Allen Dizon bilang Best Actor para sa Dinukot; Roderick Paulate na nagwagi bilang Best Supporting Actor para sa Dead na si Lolo; Pooh, Zanjoe Marudo, at John Pratts para sa Best Comedy/Gag Show na Banana Split; at Zaijian “Santino” Jaranilla na pinarangalan bilang Natatanging Gawad Tanglaw para sa Sining ng Telebisyon.

Binigyang parangal si Gov. Vilma Santos-Recto bilang Best Actress para sa 2009 Star Cinema movie na In My Life.

Nakuha naman ni Luis Manzano ang kanyang first acting award bilang Best Supporting Actor at si John Lloyd Cruz naman bilang Best Actor para sa In My Life.